Fleire tusen år gamalt støv dukkar opp på nattehimmelen

Meteorsvermen som dei næraste nettene vil dukke opp på ein skyfri nattehimmel, er fleire tusen år gamalt støv frå den berømte Halleys komet som brenn opp i møte med jordatmosfæren.

Dei som ikkje fekk med seg svermen natt til onsdag, får ein ny sjanse natt til torsdag. Det er desse nettene som blir rekna som «årets maksimum».

– Dei som er ute på ein mørk stad, og har lite skyer, kan dei neste nettene oppleve ein flott meteorsverm, fortel astrofysikar Knut Jørgen Røed Ødegaard.

238.000 kilometer i timen

Svermen blir kalla Orionidene, fordi stjerneskota ser ut til å strøyme ut frå stjernebiletet Orion.

Sjølve kometen er derimot i dei ytre delane av solsystemet, men denne veka går jorda gjennom støvbandet som kometen har etterlate seg.

Når støvkorna treff atmosfæren i svimlande 238.000 kilometer i timen – noko som tilsvarar flydistansen frå Kirkenes til Stavanger på 25 sekund – brenn dei raskt opp og skapar lysande strekar.

Månen går ned utpå natta, noko som gjer tilhøva ideelle akkurat når svermen er på sitt beste.

– Etter midnatt, og særleg noko seinare på natta, kan vi frå heilt mørke stadar sjå 10–20 stjerneskot i timen frå denne svermen. Enkelte år aukar aktiviteten endå meir, så dette er absolutt ein sverm det er verdt å følgje med på, oppmodar Ødegaard.

Sjansen er størst i nord

Det er likevel eit spenningsmoment: skydekket.

Vakthavande meteorolog Ingrid Bentsen fortel at vêret vil variere kraftig i ulike delar av landet. Men ein landsdel peikar seg ut med størst sjanse til å sjå svermen.

– Første nettene kan ein kanskje få sett det i Trøndelag, men det blir finast og mest klarvêr i Nord-Noreg så dei har nok best sjanse, seier Bentsen.

For Sør-Noreg sin del blir det skya over det meste av landsdelen natt til torsdag. Derimot blir det lettare natt til fredag og i helga.

Publisert 21.10.2026, kl. 06.59 Oppdatert 21.10.2026, kl. 07.18